Como cada ano as entidades federadas en Dano Cerebral Estatal redactan un manifesto conxunto no que recollen as súas demandas e inquedanzas. Este 2025, o movemento asociativo pon en valor os 30 anos da existencia da federación estatal e alza a súa voz para reivindicar as necesidades de atención e dereitos das persoas con DCA e as súas familias.

Manifesto polo Día Nacional do Dano Cerebral Adquirido: 30 anos construíndo dignidade

Neste enlace podes acceder ao manifesto en formato de Lectura fácil.

O 26 de outubro conmemoramos o Día Nacional do Dano Cerebral Adquirido. Unha data para lembrar que, en España, viven aproximadamente medio millón de persoas con Dano Cerebral Adquirido. Unha data que nos convoca a visibilizar a súa realidade e a das súas familias, recoñecer os seus dereitos e reclamar unha atención adecuada ás súas necesidades.

Este ano celebramos o 30 aniversario da Federación Española de Dano Cerebral. Tres décadas nas que persoas con DCA e familias xeramos espazos de apoio, comprensión e defensa dos nosos dereitos.

O DCA prodúcese, de forma súbita, por diferentes causas (ictus, traumatismos cranioencefálicos, tumores cerebrais, anoxias…). As súas secuelas -físicas, cognitivas, condutuais ou emocionais- transforman radicalmente a vida. Fronte a esa realidade, é imprescindible que as administracións garantan respostas coordinadas, equitativas e universais.

Insistimos nas nosas reivindicacións como movemento asociativo:

1. A creación dun código diagnóstico específico de DCA á alta hospitalaria para mellorar o seguimento e a atención desde o primeiro momento;
2. unha Estratexia ou Plan Nacional de Atención ao DCA que coordine recursos, servizos e apoios de forma integral;
3. a elaboración dun censo estatal de persoas con DCA que permita coñecer cifras reais que contemplen todas as causas;
4. e o acceso a unha atención integral, inclusiva e universal que contemple ás familias e á diversidade de realidades, como os e as menores con DCA infantil, as persoas con DCA gravemente afectadas ou con problemas de saúde mental, ou as persoas en situación de maior vulnerabilidade.

Lembramos hoxe tamén a urxencia de contar con máis recursos especializados, apoios técnicos e persoais que garantan a autonomía, a formación específica de profesionais e oportunidades reais de participación social e ocio inclusivo. E, especialmente, o recoñecemento para unha discapacidade a miúdo invisible, que require acompañamento e apoio continuado.

As asociacións de dano cerebral son, desde fai tres décadas, un motor de transformación social. Son espazos de reunión e esperanza, onde as persoas atopan comprensión, información, terapias e apoios que non achan noutros lugares. Son, sobre todo, comunidades que constrúen dignidade.

Hoxe, 26 de outubro, reclamamos ás institucións un compromiso real e sostido que garanta os dereitos e a inclusión das persoas con DCA e das súas familias. Aválannos trinta anos de loita; esiximos que os próximos sexan de igualdade, inclusión plena e respecto.

Este manifesto foi elaborado coa participación de persoas con dano cerebral de asociacións de diferentes partes de España.